അടയാളം ഓൺലൈനിൽ ഖണ്ഡശ: പ്രസിദ്ധീകരിച്ചപ്പോഴാണ് അയ്യപ്പൻ വായിച്ചു തുടങ്ങിയത്. ആദ്യത്തെ മൂന്നാല് അധ്യായം വായിച്ച ശേഷം വായന നിർത്തിയത് ഖണ്ഡശ വായിക്കുമ്പോൾ കഥയുടെ ഫ്ലോ അങ്ങ് പോകുമെന്നോർത്തായിരുന്നു. അഭിപ്രായം അറിയാൻ മെസേജ് അയക്കുന്ന എഴുത്തുകാരനോട് നോവൽ വായിച്ചില്ലെന്നു തുറന്നു പറഞ്ഞു.
അങ്ങനെയിരിക്കെ മൂന്നാഴ്ച മുൻപ് അയ്യപ്പൻ ഇങ്ങെത്തി. സ്വാഭാവിക മടി കാരണം വായിച്ചു തുടങ്ങാൻ കഴിഞ്ഞില്ല. മീര വായിച്ചു തുടങ്ങിയിരുന്നു. അസൂയ മൂത്തപ്പോൾ ഞാൻ സജഷൻവച്ചു – മീര ഉറക്കെ വായിക്കുക. ഞാനും ആമിയും മാതുവും കേട്ടിരിക്കും. രണ്ടു ദിവസം കൊണ്ട് 8 അധ്യായം പൂർത്തിയായി.
ഇതുവരെ കേൾക്കാത്ത ഒരു അയ്യപ്പ ചരിതം. മിത്തിനെക്കാൾ ചരിത്രം നിറഞ്ഞു നിൽക്കുന്നു. ഭക്തിയെക്കാൾ യുക്തി പിണഞ്ഞിരിക്കുന്നു.
ഇനിയെന്ത്? എന്ന ആകാംക്ഷ ഓരോ വരിയിലും വായനയെ വലിച്ചു മുന്നോട്ടു കൊണ്ടു പോകുന്നു.
അടുത്ത ദിവസം, കൂട്ടായ വായനയ്ക്ക് കാത്തു നിൽക്കാതെ ഞാൻ പുസ്തകം കയ്യിലെടുത്തു.
41 അധ്യായങ്ങൾ, ഒരു ത്രില്ലർ സിനിമ കാണുന്ന ഉദ്വേഗത്തോടെ വായിച്ചു തീർത്തു.
വാക്കുകളിൽ ദൃശ്യങ്ങൾ നിറച്ച ലളിതസുന്ദരമായ ഭാഷ.
കേട്ടറിഞ്ഞിട്ടുള്ള ഐതിഹ്യത്തിനെ, നിറഞ്ഞ ആദരവോടെ, ചരിത്രത്തിൻറെ ഉൾക്കാഴ്ചയോടെ പൊളിച്ചെഴുതുകയാണ് അനീഷ് തകടിയിൽ Aneesh Thakadiyil.
2022 ൽ നിർബന്ധമായി വായിച്ചിരിക്കേണ്ട നോവൽ.
