ചരിത്രത്തിൻ്റെ വെളുമ്പിലൂടെ നടക്കുന്ന ഒരു ഭാവനാ സഞ്ചാരമെന്ന് അനീഷ് തകടിയിലിൻ്റെ നോവലിനെ വിളിക്കാമെന്നു തോന്നുന്നു.’ ഹുമയൂൺ തെരുവിലെ സാക്ഷി’ പൂർണമായും ഭാവനാസൃഷ്ടിയാണ്. എന്നാലും അത് ചരിത്രത്തിലേക്കുള്ള ടോർച്ച് മിന്നിക്കലും ആവുന്നുണ്ട്. ചരിത്രത്തെത്തന്നെ തിരുത്തി എഴുതാനുള്ള വർത്തമാന ശ്രമങ്ങൾക്കിടയ്ക്ക് ഇത്തരം ടോർച്ചടികൾക്ക് സവിശേഷമായ പ്രസക്തിയുമുണ്ട്.
ചരിത്ര സൃഷ്ടാക്കൾ അല്ലെങ്കിലും ചരിത്ര നിർമ്മിതികളുടെ പ്രതിനിധാനമാകാവുന്ന കുറെ കഥാപാത്രങ്ങൾ ഓരോ അധ്യായത്തിലും അവതരിക്കപ്പെടുന്ന രചനാരീതിയാണ് ഈ ചെറു നോവലിൻ്റേത്. ചരിത്രത്തിലെ നീതികേടുകളെ അതിൻ്റെ കർത്താക്കളുടെ / ഇരകളുടെ അനന്തര തലമുറ എങ്ങനെ നോക്കിക്കാണുന്നു എന്ന കൗതുകക്കാഴ്ച, ഈ നോവലിൽ ‘ സംഘർഷ ഭരിതമായി ‘ വളർത്തിയെടുക്കുന്നതിൽ അനീഷ് എത്ര കണ്ട് വിജയിച്ചിരിക്കുന്നു എന്നത് വിമർശനബുദ്ധ്യാ പരിശോധിക്കാവുന്നതാണെങ്കിലും അതിലെ പുതുമയെ അഭിനന്ദിക്കാതിരിക്കാനാവില്ല. ആ പുതുമ തന്നെയാണ് ചരിത്രത്തിലെക്കുള്ള തെളിച്ചമായി നോവലിനെ മാറ്റുന്നതും.
